اقتصادی رابطہ کمیٹی (ای سی سی) نے پاکستان اسٹیل ملز کے ملازمین  کے لیے  19 ارب 65 کروڑ روپے کے فنڈز کی منظوری دے دی ہے۔

تفصیلات کے مطابق  مشیر خزانہ ڈاکٹر عبدالحفیظ شیخ کی صدارت ہونے والے اقتصادی رابطہ کمیٹی ( ای سی سی ) اجلاس  کا اعلامیہ جاری کردیا گیا۔

ای سی سی  نے وزارت قومی صحت کو ویکسین  کے لیے ورلڈ بینک اور دیگر اداروں سے بات چیت کی  ہدایت کردی۔

جی 20 ممالک سے قرضوں پر سود کی ادائیگی کی جنوری سے جون 2021ء تک 6 ماہ  کے لیے معطلی پر رجوع کرنے کی منظوری  دے دی گئی۔

اجلاس میں پاکستان سٹیل ملز کے ملازمین کی تعدادمیں کمی کا عمل شروع کرنے کیلئے 19.656 ارب روپے کی تکنیکی ضمنی گرانٹ کی منظوری دی گئی۔

اجلاس میں    کورونا ویکسین کی خریداری  کے لیے 15 کروڑ ڈالر کی تکنیکی ضمنی گرانٹ کی منظوری  دے دی گئی۔  ویکسین پہلے مرحلے میں شدید متاثرہ 5 فیصد آبادی  کے لیے استعمال کی جائے گی۔

دستیابی کے بعد پہلے مرحلے میں ایک کروڑ افراد کو ویکسین مہیا کی جائے گی۔ پہلے مرحلے میں ہیلتھ ورکرز اور 65 سال سے زائد عمر کے افراد کو ویکسین فراہم کی جائے گی۔