اسلام آباد ہائیکورٹ نے  شادی ہال میں تقاریب پر پابندی کے خلاف کیس کا تحریری فیصلہ جاری کردیا۔

تفصیلات کے مطابق عالمی وباء  کورونا وائرس کی وجہ سے شادی ہال میں تقاریب پر پابندی کے خلاف کیس کا تحریری فیصلہ جاری کردیا گیا۔

اسلام آباد ہائی کورٹ کے چیف جسٹس اطہر من اللہ نے 8 صفحات پر مشتمل فیصلہ تحریر کیا۔

فیصلے میں کہا گیا کہ  ایگزیکٹو معاملات میں مداخلت نہ کرنے کی وجہ سے درخواست نمٹائی جاتی ہے،عدالت این سی او سی کے فیصلوں پر مداخلت نہیں کرسکتی۔

فیصلے میں مزید کہا گیا کہ  نیشنل کمانڈ اینڈ آپریشنل سینٹر کا فیصلہ مفاد عامہ کا فیصلہ ہے،  قومی کمیٹی کے فیصلوں پر عملدرآمد ہر شہری کا فرض ہے۔ بحثیت شہری ہم سب کو قومی کمیٹی کے فیصلوں کو من و تسلیم کرکے اس پر عملدرآمد کرنا چاہئے۔

عدالتی فیصلے میں کہا گیا کہ  ملک بھر کی جیلوں میں قیدیوں کی حد سے زیادہ تعداد کی وجہ کورونا پھیلاؤ کا خدشہ ہے۔جیلوں میں بہت سارے انڈر ٹرائل قیدی ہیں جو بعد میں بے گناہ ثابت ہوکر رہا ہوتے ہیں۔

فیصلے میں کہا گیا کہ عدالت قومی کمیٹی سے توقع رکھتی ہے کہ جیل میں قیدیوں کی طبی سہولیات کے حوالے سے اقدامات اٹھائیں گے۔ کمیٹی کورونا سے بچنے کے لیے جیلوں کے اندر قیدیوں کی  زندگی بچانے کے لیے اقدامات  کرےگی۔