پاکستان اور ایران کے وزرا خارجہ کے مابین فیصلہ کیا گیا ہے کہ افغانستان میں قیام امن کے لئے مشترکہ کاوشیں بروئے کار لائی جائیں۔

تفصیلات کے مطابق وزیر خارجہ مخدوم شاہ محمود قریشی نے ایرانی وزیر خارجہ ڈاکٹر جواد ظریف کے ہمراہ میڈیا سے گفتگو کرتے ہوئے بتایا ہے کہ ہماری بہت اچھی نشست رہی باہمی دلچسپی کے متعدد امور پر تبادلہ خیال ہوا جو ہمارے دو طرفہ تعلقات میں مزید وسعت کی غماضی کرتا ہے۔

وزیر خارجہ کا کہنا تھا کہ افغانستان کے معاملے پر پاکستان اور ایران کے موقف میں خاصی مماثلت پائی جاتی ہے ہم نے فیصلہ کیا ہے کہ افغانستان میں قیام امن کے مشترکہ مقصد کے حصول کیلئے باہمی مشاورت کے ذریعے مشترکہ کاوشیں بروئے کار لائی جائیں۔

انہوں نےکہا کہ ایران اور ایران کی قیادت نے مسئلہ کشمیر پر جس طرح پاکستان کا ساتھ دیا ہے اور پاکستانی عوام کے دل جیتے ہیں اور ایران کے وزیر خارجہ ڈاکٹر جواد ظریف نے مجھے یقین دلایا ہے کہ وہ آئندہ بھی عالمی فورمز پر پاکستان کا ساتھ دیتے رہیں گے۔

بعدازاں ایرانی وزیر خاجہ نے بتایا ہے کہ ہم نے باڈر مینجمنٹ کے حوالے سے بھی خصوصی بات چیت کی ہے اور ہم اس سلسلے میں بہت پرامید ہیں۔

جواد ظریف کا کہنا تھا کہ پاکستان کی طرف سے بارڈر سیکورٹی کے حوالے سے ہمیں بہت اچھا رسپانس مل رہا ہے اور ہم بہت مطمئن ہیں، یقیناً باہمی تعاون سے ہم اس میں مزید بہتری لا سکتے ہیں۔

انہوں نے کہا کہہمیں خوشی ہے کہ پاکستان بارڈر پر باڑ لگانے سمیت سیکورٹی میں بہتری کے لیے اقدامات کر رہا ہے۔