چیئرمین پیمرا کی خلاف قانون تعیناتی و بول  کے خلاف ظالمانہ اقدامات پر صحافی،وکلاء اورسول سوسائٹی سراپا احتجاج بن گئے۔

 پیمرا دفتر لاہور کے باہر صحافیوں کی جانب سے سیکرٹری پریس کلب و بیورو ہیڈ بابر ڈوگر ،سینئراینکرز اسد کھرل،اسامہ غازی،سیکرٹری ایف یوجے راناعظیم،صدر ایمرا آصف بٹ ،مسلم لیگ ن وکلاء ونگ کے ڈپٹی سیکرٹری رانا روحیل اور سول سوسائٹی کے صدر عبداللہ کی قیادت میں کثیرالتعداد بول ملازمین و صحافی کارکنوں نے شرکت کی اور چیئرمین پیمرا کی معطلی تک احتجاج جاری رکھنے کا اعلان کیا۔

 مظاہرین کا کہنا تھا کہ بول پر پہلے بھی ظالمانہ اقدامات ڈھائے گئے اور اس طرح کے آمرآنہ ہتھکنڈوں کو کسی طور قبول نہیں کیا جائے گا۔

مظاہرین کا کہنا تھا کہ حکومت اپوزیشن میں رہتے ہوئے اداروں میں میرٹ پر تعیناتی کی دعویدار تھی مگر آج اقتدار میں آنے کے بعد روایتی ہتھکنڈوں پر اتر آئی ہے ۔

مظاہرین کی جانب سے اعلامیہ میں کہا گیا کہ جب تک بول پر پابندی قائم ہے تب تک حکومتی پروگرامز میں حکومت مخالف و بول کے حق میں نعرہ بازی کی جائے گی۔

مظاہرین نے کہا کہ وزیراعظم میرٹ کے خلاف اس تعیناتی و آمرانہ اقدامات کو روکنے کے لیے اپنا کردار ادا کرے ورنہ احتجاج کا دائرہ کار حکومتی ایوانوں تک پھیل جائے گا۔