اسلام آباد میں اساتذہ کی جانب سے   مستقل نہ کیے جانے پر بنی گالہ میں احتجاج   کی کوشش کرنے پر متعدد اساتذہ کو گرفتار کرلیا گیا۔

تفصیلات کے مطابق  بنی گالہ جانے والے راستوں پر پولیس کی بھاری نفری تعینات کرکے، مری روڈ اور چک شہزاد روڈ پر پولیس کی ٹیمیں پہنچا دی گئیں۔ پولیس کی بکتر بند گاڑیاں اور خار دار تاریں بھی بچھا دی گئیں۔

پولیس نے احتجاج کے لیے آنے والے 14 مظاہرین کو گرفتار کرکے تھانوں میں منتقل کردیا ہے۔ گرفتار ہونے والوں میں ایک خاتون بھی شامل ہیں۔

ذرائع کا کہنا ہے کہ گرفتار افراد کو تھانہ سیکرٹریٹ، بھارہ کہو اور تھانہ شہزاد ٹاؤن منتقل کیاگیا ہے۔ احتجاج کرنے والی خاتون کو تھانہ وومن شفٹ کیا گیا ہے۔

دوسری جانب صوبائی وزیر تعلیم پنجاب ڈاکٹر مراد راس کا بنی گالا میں اساتذہ کے احتجاج کے حوالے سے ردعمل میں کہنا ہے کہ اساتذہ کا احتجاج مکمل طور پر بے بنیاد ہے۔