لائن آف کنٹرول(ایل او سی ) پر بھارتی افواج کی جانب سے سیز فائر کی خلاف ورزی کیے جانے پر  بھارتی ناظم الامور کو دفترخارجہ طلب کرلیا گیا۔

تفصیلات کے مطابق پاکستان نے لائن آف کنٹرول(ایل او سی ) پر سیز فائر کی خلاف ورزی پر بھارتی ناظم الامور کو دفتر خارجہ طلب کرکے شدید احتجاج ریکارڈ کرایا ہے۔

ترجمان دفتر خارجہ کا کہنا ہے بھارت اقوام متحدہ سلامتی کونسل کی قراردادوں پر عمل درآمد یقینی بنائے۔

ترجمان دفتر خارجہ نے بتایا کہ بھارتی افواج نے تتہ پانی اور جندروٹ سیکٹرز پر 22 دسمبر  کو بلااشتعال فائرنگ کی،بھارتی افواج کی اشتعال انگیزی سے ایک خاتون شہری شہید اور تین شہری شدید زخمی ہو  گئے۔

ترجمان دفتر خارجہ نے بتایا کہ بھارت رواں برس 3012 بار سیز فائر کی خلاف ورزیاں کر چکا ہے۔رواں برس بھارتی فائرنگ سے 28 شہادتیں اور253 افراد زخمی ہو چکے ہیں۔

ترجمان دفتر خارجہ کا کہنا ہے بھارت کا معصوم شہریوں کو جان بوجھ کر نشانہ بنانا قابل مذمت ہے۔

انہوں نے مزید کہا کہ بھارت کی پے در پے اشتعال انگیزیاں خطے میں امن و سلامتی کے لیے خطرہ ہیں۔بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا ۔

ترجمان دفتر خارجہ نے کہا کہ اقوام متحدہ فوجی مبصر مشن کو ایل او سی پر کام کرنے دیا جائے۔