وزیر خارجہ شاہ محمود قریشی نے کہا ہے کہ مستقبل میں پاکستان اور متحدہ عرب امارات کے درمیان باہمی تعلقات مزید مضبوط ہوں گے۔

تفصیلات کے مطابق پاکستان میں متحدہ عرب امارات کے سفیر حماد عبید ابراہیم الزعابی نے دبئی میں وزیر خارجہ شاہ محمود قریشی سے ملاقات کی اور دو طرفہ تعلقات اور مختلف شعبہ جات میں دو طرفہ تعاون کے فروغ کے حوالے سے تبادلہ خیال کیا۔

اماراتی سفیر حماد عبید ابراہیم الزعابی نے متحدہ عرب امارات آمد پر وزیر خارجہ شاہ محمود قریشی کو خوش آمدید کیا۔

اس موقع پر وزیر خارجہ شاہ محمود قریشی نےکہا کہ متحدہ عرب امارات نے ہمیشہ پاکستانی بھائیوں کے ساتھ خصوصی محبت کا اظہار کیا ہے،پاکستان میں ہسپتالوں کے قیام اور دیگر ترقیاتی کاموں میں معاونت پرمتحدہ عرب امارات کے شکرگزار ہیں۔

وزیر خارجہ شاہ محمود قریشی نے مزید کہا کہ دونوں ممالک کے مابین دیرینہ برادرانہ تعلقات ہیں جنہیں ہمارے تاریخی ، ثقافتی، ادبی، معاشی و اقتصادی تعلقات نے مزید مستحکم بنایا ہے جبکہ مجھے یقین ہے کہ مستقبل میں پاکستان اور متحدہ عرب امارات کے درمیان باہمی تعلقات مزید مضبوط ہوں گے۔

پاکستان ميں تعینات اماراتی سفیر حماد عبید ابراہیم الزعابی نے وزیر خارجہ کا شکریہ ادا کرتے ہوئے پاکستان اور متحدہ عرب امارات کے مابین تعلقات کو مزید وسعت دینے کیلئے اپنی بھرپور کاوشیں بروئے کار لانے کا یقین دلایا۔

دوبئی میں وزیر خارجہ شاہ محمود قریشی سے اماراتی سفیر کی ہونے والی ملاقات میں پاکستان کے قونصل جنرل احمد امجد علی بھی موجود تھے۔