اردن کی مسلح افواج کے چیٸرمین جواٸنٹ چیفس آف اسٹاف کی پاک بحریہ کے سربراہ سے ملاقات ہوئی ہے۔

اس ضمن میں پاک بحریہ کے ترجمان کا کہنا ہے کہ اردن کی مسلح افواج کے چیٸرمین جواٸنٹ چیفس آف اسٹاف میجر جنرل یوسف الحنیطی، نیول ہیڈ کوارٹرز اسلام آباد آئے ہیں جہاں پر پاک بحریہ کے سربراہ ایڈمرل محمد امجد خان نیازی نے معزز مہمان کا استقبال کیا۔

ترجمان کا کہنا ہے کہ معزز مہمان کو روایتی انداز میں گارڈ آف آنر پیش کیا گیا جبکہ معزز مہمان نے نیول ہیڈ کوارٹرز میں یادگار شہداء پر پھول چڑھائے اور ان کا پرنسپل اسٹاف آفیسرز سے تعارف کرایا گیا۔

اردن کی مسلح افواج کے چیٸرمین جواٸنٹ چیفس آف اسٹاف نے سربراہ پاک بحریہ سے ملاقات کی اور ملاقات کے دوران باہمی دلچسپی کے امور اور دو طرفہ تعاون پر تبادلہ خیال کیا گیا۔

معزز مہمان نے خطے میں بحری سیکیورٹی اور استحکام کے حوالے سے پاک بحریہ کی کاوشوں کو سراہا جبکہ ملاقات میں دونوں ممالک کے درمیان دفاعی تعاون کو مذید مضبوط کرنے کے عزم کا بھی اعادہ کیا گیا۔