ترک وزیر خارجہ میولوت چاوش اوغلو نے کہا ہے کہ  پاکستان ہر مشکل میں ترکی  کے ساتھ شانہ بشانہ کھڑا رہا ہے۔

ترک سفارتخانے  میں صحافیوں سے غیررسمی گفتگو کرتے ہوئے ترک وزیر خارجہ میولوت چاوش اوغلو نے کہا  کہ  پاکستان اور ترکی کے مابین بھائی چارے پر مبنی مضبوط تعلقات ہیں ، پاکستان ہر مشکل میں ترکی  کے ساتھ شانہ بشانہ کھڑا رہا۔

ترک وزیر خارجہ نے کہا کہ  پاکستان نے دہشتگردی  کے خلاف لازوال قربانیاں دی ہیں۔ پاکستان نے انسداد دہشتگردی کی جنگ میں غیرمعمولی کامیابیوں کی بھاری قیمت چکائی ہے۔ پاکستان کی ترقی  کے لیے دہشتگردی کے ناسور کو مکمل شکست دینا ناگزیر ہے۔

انہوں نے مزید کہا کہ  فتح اللہ گولن دہشتگرد تنظیم انتہائی خطرناک ہے،پاکستان کو فیتو سے انتہائی محتاط اور خبردار رہنا ہو گا۔فیتو جیسی دہشتگرد تنظیموں سے نمٹنے  کے لیے مشترکہ کاوشوں کی ضرورت ہے۔ ترکی انسداد دہشتگردی کی جنگ میں پاکستان  کے ساتھ کھڑا ہے۔

ترک وزیر خارجہ نے کہا کہ  ارطغرل صرف ڈرامہ نہیں، پوری تاریخ ہے۔ہمیں خصوصاً نوجوانوں کو اپنی تاریخ سے شناسائی حاصل کر کے آگے بڑھنا ہو گا۔