ایکسائز ڈیپارٹمنٹ نے نادرا سے گاڑیوں کے رجسٹریشن کارڈ بنوانے کا فیصلہ کرلیا۔

ذرائع کے مطابق   ایکسائز ٹیکسیشن اینڈ نارکوٹکس کنٹرول ڈیپارٹمنٹ پنجاب نے انباکس ٹیکنالوجی کو چھوڑ کر قومی ادارے نادرا سے گاڑیوں کے رجسٹریشن کارڈ بنوانے کا فیصلہ کرلیا ہے۔

ذرائع کا کہنا ہے کہ ڈی جی ایکسائز ٹیکسیشن اینڈ نارکوٹکس کنٹرول ڈیپارٹمنٹ پنجاب صحالحہ سعید اپنی ٹیم کے ہمراہ نادرا ہیڈ کوآرٹرز میں متعلقہ حکام سے پہلی ملاقات کرچکی ہیں اور فریقین میں فی کارڈ قیمت پر بات چیت چل رہی ہے۔

قبل ازیں نادرا کی طرف سے اسلام آباد ایکسائز اینڈ ٹیکسیشن ڈیپارٹمنٹ کو گاڑیوں کے رجسٹریشن کارڈ فراہم  کیےجاتے ہیں جس پر نادرا فی کارڈ ایک ہزار 4 سو روپے وصول کرتی ہے۔

واضح رہے کہ ایکسائز ٹیکسیشن اینڈ نارکوٹکس کنٹرول ڈیپارٹمنٹ پنجاب نے گاڑیوں کے رجسٹریشن کارڈز(آٹومیٹڈ رجسٹریشن کارڈ)  کے حوالے سے  28 مئی اکتوبر 2018سے انباکس بزنس ٹیکنالوجیز پرائیویٹ لمیٹڈ کے ساتھ معاہدہ کر رکھا ہے۔

معاہدے کی معیاد مئی 2023 تک ہے۔ معاہدے کے تحت انباکس ٹیکنالوجی  438 روپے 75 پیسے فی کارڈ مہیا کرتی ہے اور کمپنی نے 5  برسوں کے دوران مجموعی طور پرایک کروڑ ڈیٹا رجسٹریشن کارڈ مہیا کرنا ہیں۔

تاہم کمپنی کی ناقص کاکردگی اور کارڈز کی لاگت   کئی لاکھ تک بڑھنے کی وجہ سے  ایکسائز ڈیپارٹمنٹ نادرا سے معاہدہ کر نے جارہا ہے۔

ذرائع کا مزید کہنا ہے کہ  ناقص کارکردگی پر انباکس ٹیکنالوجی کو شو کاز بھی جاری کیا جاچکا ہے۔