سینیٹر شیری رحمان نے کہا ہے کہ وزیراعظم عمران خان کا بیان کوئٹہ میں گزشتہ 6 روز سے پڑی میتوں کی سراسر توہین ہے۔

تفصیلات کے مطابق سینیٹر شیری رحمان کی جانب سے عمران خان کی تقریر پر ردعمل ظاہر کیا گیا ہے جس میں انہوں نے کہا ہے کہ وزیراعظم نے ثابت کیا کہ وہ نا صرف نا اہل ہیں بلکہ بے رحم بھی ہیں۔

شیری رحمان کا کہنا تھا کہ ہزارہ برادری عمران خان سے نہیں ملک کے وزیراعظم سے مطالبہ کر رہی ہے جبکہ آج یہ بھی ثابت ہو گیا کہ وہ خود کو وزیر اعظم بھی نہیں سمجھتے ہیں۔

انہوں نے کہا ہے کہ عمران خان بنی گالا کے وزیراعظم ہو سکتے ہیں وہ ملک کے وزیر اعظم نہیں بن سکے اور صرف اتنا ہی نہیں بلکہ وزیراعظم نے کوئٹہ جانے کو اپنی ذاتی انا کا مسئلہ بنا دیا ہے تاہم انا پسند اور بے رحم وزیر اعظم نے آج بد ترین مثال قائم کی ہے۔

ان کا کہنا تھا کہ ہزارہ برادری کو معلوم ہونا چاہئے کہ ملک پر ایک فاشسٹ حکمران مسلط کیا گیا ہے اور اس فاشسٹ وزیراعظم کو عوام کی کوئی پرواہ نہیں ہے۔