سپریم کورٹ  نے ڈینیئل پرل قتل کیس  کے مرکزی ملزم کو  سرکاری ریسٹ ہاؤس منتقل کرنے کا حکم دے دیا۔

تفصیلات کے مطابق    سپریم کورٹ میں ڈینیئل پرل قتل کیس کے مرکزی ملزم احمد عمر شیخ کی رہائی  کے خلاف درخواست پر سماعت ہوئی۔

سپریم کورٹ نے گذشتہ روز کی سماعت کا تحریری حکمنامہ جاری کر دیا۔

حکمنامے میں کہا گیا کہ  احمد عمر شیخ کو دو روز تک جیل میں آرام دہ رہائش کی سہولت فراہم کی جائے،  دو دن میں تمام ضروری انتظامات مکمل  کرکے  احمد عمر شیخ کو سرکاری ریسٹ ہاؤس منتقل کیا جائے۔

عدالتی حکمنامے میں کہا گیا کہ   ریسٹ ہاؤس میں احمد عمر شیخ کو انٹرنیٹ اور موبائل سمیت باہر کی دنیا سے رسائی کی سہولت حاصل نہ ہو اور اسے ایسی جگہ رکھا جائے  جہاں سکیورٹی انتظامات کرنا آسان ہوں۔

حکمنامے میں کہا گیا کہ  ایڈووکیٹ جنرل سندھ اور اٹارنی جنرل کا کہنا ہے کہ  احمد عمر شیخ رہائی کے بعد فرار ہو سکتا ہے۔ اٹارنی جنرل نے سندھ ہائیکورٹ کے فیصلے  کے خلاف ایک ہفتے میں اپیل دائر کرنے کی مہلت مانگی ہے۔

عدالتی حکمنامے کے مطابق  احمد عمر شیخ کے خاندان کے افراد صبح 8 بجے سے شام 5 بجے تک ملاقات کر سکیں گے۔ احمد عمر شیخ کی فیملی کے کراچی میں ٹرانسپورٹ سمیت دیگر اخراجات سندھ حکومت برداشت کرے گی۔

عدالت نے حکمنامے میں کہا کہ کیس کی  مزید سماعت 2 ہفتوں کے بعد ہوگی۔