ملائشیا میں تعینات پاکستانی ہائی کمشنر محترمہ آمنہ بلوچ کی وزارتِ خارجہ میں وزیر خارجہ مخدوم شاہ محمود قریشی سے ملاقات ہوئی ہے۔

پاکستانی ہائی کمشنر محترمہ آمنہ بلوچ نے وزیر خارجہ کو ملائشیا اور پاکستان کے مابین دو طرفہ تعلقات اور کثیرالجہتی شعبہ جات میں دو طرفہ تعاون کے فروغ کے حوالے سے کی جانے والی کاوشوں سے آگاہ کیا ہے۔

وزیر خارجہ کا کہنا تھا کہ پاکستان اور ملائشیا کے مابین دو طرفہ تعلقات، یکساں مذہبی، ثقافتی اقدار پر استوار ہیں۔

 مخدوم شاہ محمود قریشی  نے کہا ہے کہ پاکستانیوں کی کثیر تعداد ملائشیا میں مقیم ہے جو ملائشیا کی تعمیر و ترقی میں اپنا کردار ادا کر رہی ہے۔

وزیر خارجہ نے پاکستانی کمیونٹی کی فلاح و بہبود کیلئے پاکستانی ہائی کمیشن کی جانب سے اٹھائے گئے اقدامات کو سراہا ہے۔

وزیر خارجہ نے پاکستانی ہائی کمشنر کو ملائشیا میں مقیم پاکستانی ورکرز کی فلاح و بہود کا خصوصی خیال رکھنے اور ان کو درپیش مسائل کے جلد ازالے کی ہدایت کی ہے۔

وزیر خارجہ نے کرونا عالمی وبا کے دوران پاکستانی کمیونٹی کا خصوصی خیال رکھنے اور محدود وسائل کے باوجود بھرپور معاونت فراہم کرنے پر محترمہ آمنہ بلوچ کا شکریہ ادا کیا ہے۔

وزیر خارجہ نے پاکستان اور ملائشیا کے مابین مختلف شعبوں میں دو طرفہ اقتصادی تعاون بڑھانے کیلئے مزید کاوشیں بروئے کار لانے کی ضرورت پر زور دیا ہے۔

ملائشیا میں تعینات پاکستانی ہائی کمشنر محترمہ آمنہ بلوچ نے توصیفی کلمات اور حوصلہ افزائی پر وزیر خارجہ کا شکریہ ادا کیا ہے۔