صدر مملکت ڈاکٹر عارف علوی نے کہا ہے کہ اگر نوجوان نسل پر سرمایہ کاری کی جائے تو پاکستان کو ترقی یافتہ ملک بننے سے کوئی نہیں روک سکتا ہے۔

تفصیلات کے مطابق صدر ڈاکٹرعارف علوی نے نیشنل یونیورسٹی آف ٹیکنالوجی میں تقریب سے خطاب کرتے ہوئے کہا کہ ہمیں جدید علوم کے حصول پر توجہ دینا ہوگی اور مصنوعی ذہانت، سائنس و ٹیکنالوجی اور آئی ٹی کے شعبوں میں آگے بڑھنا ہوگا۔

ڈاکٹر عارف علوی نے کہا کہ تعلیمی ادارے صنعت کی ضروریات کو مدنظر رکھتے ہوئے افرادی قوت فراہم کرنے لگیں تو نہ صرف نوجوانوں کو موزوں روزگار کے مواقع میسر آئیں گے بلکہ اس سے صنعت کی ترقی کے امکانات بھی پیدا ہوں گے، اس مقصد کے لئے ان کے مابین روابط کو فروغ دینا وقت کا تقاضا ہے۔

صدر مملکت نے کہا کہ ان کا خواب اور دعا ہے کہ پاکستان ایک ترقی یافتہ اور طاقتور ملک بنے، اس کے لئے ان کے ذہن میں جس شعبے کا تصور سب سے پہلے آتا ہے وہ انفارمیشن ٹیکنالوجی کا شعبہ ہے۔

انہوں نے کہا کہ اس شعبہ میں آگے بڑھنے کے شاندار امکانات ہیں اور یہ مجموعی ترقی کے نئے راستے کھولنے کا بھی اہم ذریعہ ہے۔

صدر عارف علوی نے کہا کہ ہمیں دنیا میں اپنا مقام بنانے کے لئے علم و ہنر کے ساتھ ساتھ خود کو معاشی لحاظ سے بھی مضبوط بنانا ہوگا۔