پاک سر زمین پارٹی نے 28 فروری 2021 کو سہراب گوٹھ الآصف اسکوائر پر جلسہ کرنے کا اعلان کردیا ہے۔

تفصیلات کے مطابق میڈیا سے گفتگو میں مصطفیٰ کمال نے کہا ہے کہ مہاجروں پر ظلم سندھی نہیں کررہا بلکہ پیپلز پارٹی کررہی ہے جبکہ لاڑکانہ میں سندھی پر بھی ظلم کیا جارہا ہے۔

انہوں نے کہا ہے کہ ہم لسانی سیاست نہیں کریں گے تمام قومیتوں کو جوڑیں گے، آئندہ اس شہر میں زبان کی بنیاد پر سیاست نہیں ہوگی۔

مصطفیٰ کمال کا  کہنا تھا کہ ہم نے چارسالوں میں شہر کے امن میں اہم کردار ادا کیا اور اب تین مارچ کو ہمیں پانچ سال مکمل ہوجائیں گے۔

ان کا کہنا تھا کہ ہمارے سات ساتھی شہید ہوئے لیکن آج تک ایک پتھر کسی کو نہیں مارا گیا تاہم پیپلز پارٹی کے تعصب کی وجہ سے آسان ہے کہ مہاجر نام پر سیاست کروں لیکن یہ راستہ ٹھیک نہیں ہے۔

انہوں نے بتایا کہ پیپلز پارٹی حیدرآباد اور کراچی والوں کے لیے نوکریاں ختم کرکے زیادتی کررہی ہے۔