وزیراعظم  عمران خان نے وزیر اعلیٰ خیبر پختونخوا محمود خان کو وزیر قانون خیبرپختونخوا سلطان محمد سے فوری استعفیٰ   لینے کی ہدایت کردی۔

تفصیلات کے مطابق وزیر قانون خیبرپختونخوا سلطان محمد کی سینیٹ الیکشن کے لیے رشوت لینے کی مبینہ ویڈیو سامنے آنے  کے بعد وزیر اعظم عمران خان نے  وزیراعلیٰ خیبرپختونخوا سے رابطہ کیا۔

وزیراعظم نے وزیر اعلیٰ کو وزیر قانون سے فوری استعفیٰ لینے کی ہدایت کرتے ہوئے معاملے کی شفاف انکوائری کا حکم دیا اور رپورٹ بھی طلب کرلی۔

وزیر اعلیٰ محمود خان کا کہنا ہے کہ  ‏مبینہ وڈیو لیک پر صوبائی وزیر قانون سلطان محمد خان سے استعفی طلب کر کے  شفاف انکوائری کے  لیے ہدایات جاری کر دی ہیں۔

محمود خان نے کہا کہ وزیراعظم عمران خان کے وژن کے مطابق خیبر پختونخوا حکومت شفافیت اور یکساں احتساب پر کوئی سمجھوتہ نہیں کرے گی۔