ملک بھر میں کورونا وائرس کے کیسز میں ایک بار پھر اضافہ ریکارڈ کیا جارہا ہے جس پر صوبائی حکومتوں کی انتظامیہ کی جانب سے حفاظتی اقدامات کئے جارہے ہیں۔

انتظامیہ کی جانب سے حفاظتی اقدامات کے پیش نظر کراچی کے مختلف علاقوں میں اسمارٹ لاک ڈاؤن نافذ کرنے کے احکامات جاری کئے گئے ہیں۔

جاری کردہ احکامات کے مطابق ضلع وسطی کی مختلف یوسیز اور سب ڈویژن میں اسمارٹ لاک ڈاؤن ہوگا جو کہ  6 اپریل تک نافذ رہے گا۔

احکامات کے مطابق مائیکرو اسمارٹ لاک ڈاؤن مخصوص گلیوں، گھروں پر نافذ ہوگا۔

علاوہ ازیں کراچی کے علاقے لیاقت آباد کے سی ایریا اور سی ون ایریا میں اسمارٹ لاک ڈاؤن رہے گا جبکہ نارتھ کراچی کے سیکٹر2 ،سیکٹر  2 فائیو اے،  سیکٹر بی 14 میں بھی لاک ڈاؤن ہوگا۔

نارتھ کراچی کے سیکٹر7 ڈی اور 11 ڈی سمیت نارتھ ناظم آباد بلاک ایل اور بلاک این میں اسمارٹ لاک ڈاؤن ہوگا۔

یاد رہے کہ انتظامیہ کی جانب سے کراچی کے علاقوں میں اسمارٹ لاک ڈاؤن کا نوٹیفکیشن جاری کردیا گیا ہے جس کے مطابق متاثرہ علاقوں میں ہر قسم کی نقل و حرکت پر پابندی ہوگی۔