سپریم کورٹ نے سیالکوٹ کے حلقہ این اے 75 ڈسکہ میں دس اپریل کو پولنگ نہ کروانے کا حکم دے دیا ہے۔

تفصیلات کے مطابق جسٹس عمرعطا بندیال کی سربراہی میں تین رکنی بنچ نے این اے 75 ڈسکہ سے متعلق سماعت کی جس میں ن لیگی امیدروار کے وکیل سلمان اکرم راجا نے دلائل میں ضلع ڈسکہ کا مکمل نقشہ پیش کر دیا۔

انہوں نے کہا ہے کہ ڈسکہ شہر کے 76 میں سے 34  پولنگ اسٹیشنز سے شکایات آئیں تھی اور 20  پریزائیڈنگ افسر بھی غائب ہوئے۔

وکیل سلمان اکرم راجا کے دلائل پر جسٹس عمر عطا بندیال نے استفسار کیا  سوال یہ ہے کہ پولنگ کے دن کون اور کیوں یہ مسائل پیدا کرتا رہا؟ کیا ایک امیدوار طاقتور تھا اس لیے دوسرے نے یہ حرکات کروائیں؟

جسٹس نے مزید کہا کہ آپ کو ثابت کرنا ہے کہ تیئس  پولنگ اسٹیشن کی شکایت پر پورے حلقے میں دوبارہ انتخابات کیوں ضروری ہیں۔

عدالت نے فیصلے میں قراردیا کہ کیس کی مزید سماعت بینچ کی دستیابی سے مشروط ہے جیسے ہی بینچ دستیاب ہو گا کیس سماعت کیلئے مقرر ہوجائے گا۔

عدالت کا کہنا ہے کہ  موجودہ کیس کے فیصلے میں وقت درکار ہے اور سلمان اکرم راجا کے دلائل ابھی جاری ہیں جبکہ نوشین افتخار کے علاوہ باقی فریقین کو بھی سننا ہے۔

کیس پر مزید سماعت غیرمعینہ مدت کے لیے ملتوی کردی گئی ہے۔