پاک فضائیہ میں کمان کی تبدیلی کی تقریب کا انعقاد کیا گیا ہے۔

ترجمان پاک فضائیہ کے مطابق پاک فضائیہ کی کمان کی تبدیلی کی تقریب آج ہوئی جس میں نامزد ایئر چیف ظہیر احمد بابر سدھو کو سبکدوش ہونے والے سربراہ ائیر مارشل مجاہد انور خان نے بیج لگائے اور شمشیر پیش کی۔

ترجمان کا کہنا ہے کہ کمان کی تبدیلی کی تقریب میں سبکدوش ہونے والے ایئر چیف مجاہد انور خان نے پاک فضائیہ کی کمان نئے سربراہ کے حوالے کی۔

ایئر مارشل ظہیر احمد بابر سدھو:

پاک فضائیہ کے نامزد ایئر چیف مارشل ظہیر احمد بابر سدھو کا تعلق گجرات کے گاؤں سدھ سے ہے جنہوں نے 1986 میں بحیثیت فائٹر پائلٹ پاک فضائیہ کی جی ڈی (پائلٹ) برانچ میں شمولیت اختیار کی۔

ظہیر احمد بابر سدھو فائٹر اسکواڈرن ، آپریشنل ایئر بیس اور علاقائی کمانڈ بھی کر چکے ہیں علاوہ ازیں انہوں نے ایئر ہیڈ کوارٹرز اسلام آباد میں اسسٹنٹ چیف آف دی ایئر اسٹاف (آپریشن ریسرچ اینڈ ڈویلپمنٹ) ، اسسٹنٹ چیف آف ایئر اسٹاف (ٹریننگ آفیسرز) اور ڈائریکٹر جنرل پروجیکٹس کے طور پر خدمات انجام دیں۔

وزارت دفاع میں بطور ایڈیشنل سیکرٹری، برطانیہ کے کامبیٹ کمانڈرز اسکول ، ایئر وار کالج اور رائل کالج آف ڈیفنس اسٹڈیز سے فارغ التحصیل ہیں۔

انہیں پیشہ وارانہ خدمات کے اعتراف میں ہلال امتیاز (ملٹری)، ستارہ امتیاز (ملٹری) اور تمغہ امتیاز (ملٹری) سے نوازا گیا ہے۔