وزیراعظم کی معاون خصوصی ڈاکٹر ثانیہ نشتر نے کہا ہے کہ پاکستانی خواتین زندگی کے ہر شعبے میں آگے بڑھنے کی اہلیت رکھتی ہیں اور موجودہ حکومت ملکی ترقی میں خواتین کا کردار بڑھانےکے اقدمات کررہی ہے۔

تفصیلات کے مطابق وزیراعظم کی مشیر برائے سماجی بہبود ڈاکٹر ثانیہ نشتر نے اسلام آباد چیمبر آف کامرس کا دورہ کرتے ہوئے سردار یاسر الیاس سے ملاقات کی ہے۔

اس موقع پر ڈاکٹر ثانیہ نشتر نے کاروباری خواتین کو سرمایہ کاری فراہم کرنے کی یقین دہانی کرواتے ہوئے کہا ہے کہ احساس پروگرام کے تحت خواتین کا معیار زندگی بہتر کرنے کیلئے اقدامات کئے جا رہے ہیں۔

اس موقع پر سردار یاسر الیاس نے کہا ہے کہ خواتین ملک کی کل آبادی کا نصف سے زائد ہیں اور ملکی پائیدار ترقی کیلئے خواتین کو معاشی دھارے میں لانا اشد ضروری ہے۔

انہوں نے کہا ہے کہ چیمبر کاروباری خواتین کی مصنوعات کی نیٹ ورکنگ بڑھانے کیلئے مختلف پروگرام منعقد کرنے کی کوشش کرے گا تاکہ خواتین اپنے کاروبار کو بہتر فروغ دے کر معیشت کی ترقی میں مزید فعال کردار ادا کر سکیں۔