وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ استعفوں کی سیاست ختم ہوچکی ہے اور اب اصلاحات کی سیاست ہوگی۔

تفصیلات کے مطابق وفاقی وزیر برائے سائنس اینڈ ٹیکنالوجی فواد چوہدری نے پریس کانفرنس کرتے ہوئے کہا ہے کہ حکومت نے انتخابی اصلاحات کا معاملہ پارلیمنٹ میں رکھ دیا ہے، اس میں اعتراض ہے تو بات کریں، ترمیم کرتے ہیں۔

فواد چوہدری نے کہا ہے کہ انتخابی اصلاحات سے شروع کر کے نیب سمیت تمام اصلاحات پر بات کرتے ہیں اور اگر اپوزیشن حکومت کے اس اقدام کو سنجیدہ لےکر آگے نہیں بڑھی تو نقصان اٹھائے گی۔

انہوں نے کہا ہے کہ حکومت تمام جماعتوں سے الگ الگ رابطہ کرے گی کیونکہ ہماری نظر میں پی ڈی ایم ختم ہوچکی ہے۔

فواد چوہدری نے کہا ہے کہ جماعتیں ضلعوں اورصوبے تک محدود ہوچکی ہیں، سیاسی جماعتوں کو اب عمران خان فوبیا سے نکل جانا چاہیے۔