کراچی میں پاکستان رینجرز سندھ اور پولیس کی مشترکہ کارروائی کے نتیجے میں 2 دہشتگرد گرفتار کرلئے گئے ہیں۔

تفصیلات کے مطابق انٹیلیجنس معلومات کی بنیاد پر گڈاپ ٹاؤن میں پاکستان رینجرز سندھ اور پولیس نے مشترکہ کارروائی کرتے ہوئے مطلوب 2 دہشتگردوں کو گرفتار کرلیا ہے۔

اس ضمن میں ترجمان سندھ رینجرز کا کہنا ہے کہ انہتائی مطلوب 2 دہشتگردوں کا نام عبد لہادی عرف شیخ عرف بشیر اور اختر غنی ہے۔

ترجمان کا کہنا ہے کہ کارروائی کے دوران ملزمان کے قبضے سے اسلحہ، ایمیونیشن اور بارودی مواد بھی برآمد کیا گیا ہے۔

ترجمان کا کہنا ہے کہ گرفتار دہشتگردوں کا تعلق حزب الاحرار تحریک طالبان پاکستان سے ہے جو کہ کراچی میں بڑی دہشتگردی کی منصوبہ بندی کر رہے تھے اس کے  علاوہ ملزمان بھتہ وصولی، ڈکیتی  اور دیگر جرائم میں بھی ملوث پائے گئے ہیں۔