پی ڈی ایم کے سربراہ مولانا فضل الرحمان نے وزیر اعظم عمران خان کے قومی اسمبلی سے اعتماد کے ووٹ کو مسترد کر تے ہوئے قومی اسمبلی کے اجلاس کو غیر آئینی قرار دے دیا ہے۔

سکھر میں جے یو آئی رہنما آغا ایوب شاہ کی رہائش گاہ پر میڈیا سے بات چیت میں مولانا فضل الرحمان نے اسلام آباد میں پی ٹی آئی ورکرز کی جانب سے پی ڈی ایم رہنماؤں پر تشدد کی مذمت کرتے ہوئے کہا کہ یہ لفنگوں کا کام ہے جو شرفاء پر حملے کر تے ہیں اس طرح حکومتیں نہیں چلتی ہیں۔

انہوں نے کہا کہ قومی اسمبلی کے جس اجلاس سے عمران خان نے اعتماد کا ووٹ لیا ہے اس کو ہم تسلیم نہیں کرتے یہ اجلاس غیر آئینی ہے۔

مولانا فضل الرحمان کا کہنا  تھا کہ 2018 میں بھی عمران خان کی اکثریت جعلی تھی اور آج بھی اس اکثریت کو ہم تسلیم نہیں کرتے ہیں۔

انہوں نے کہا ہے کہ جس طرح کے سبز باغ آپ نے قوم کو دکھائے تھے اب یہ قوم تمہاری باتوں میں نہیں آئے گی اب نیا الیکشن کرانا ہوگا نیا نظام ہوگا اس کرپٹ حکمرانی ٹولے کو تسلیم نہیں کریں گے۔

انہوں نے عمران خان کے اسمبلی میں خطاب کو تنقید کا نشانہ بناتے ہوئے کہا کہ کبھی یہ شخص چائنا کہ نظام کی بات کرتا ہے کبھی امریکہ اور کبھی ایران کے نظام کی بات کرتا ہے۔