الیکشن کمیشن نے یوسف رضا گیلانی کی کامیابی کانوٹیفکیشن روکنے کی پی ٹی آئی کی دائر کردہ درخواست مسترد کردی  ہے۔

سماعت میں الطاف ابراہیم قریشی نے ریمارکس دیئے ہیں کہ کسی کو نا اہل کرنا ہے تو ٹھوس شواہد پیش کریں تاہم تمام درخواستیں یکجا کر کے نئی درخواست دائر کرنے کی ہدایت کی گئی ہے۔

الطاف ابراہیم قریشی نے کہا ہے کہ درخواست گزار پہلے ویڈیو کے دیگر کرداروں کوفریق بنائیں اس کے بعد ہم آئین وقانون کے مطابق کیس پرفیصلہ دیں گے۔

انہوں نے کہا ہے کہ ہر شخص اپنے کیے کا جواب دہ ہے لیکن ویڈیو میں یوسف رضا گیلانی کا نا م کہیں نہیں ہے اور جو کردار ویڈیو، آڈیو میں ہیں ان کے خلاف کارروائی ہوگی۔

ممبرالیکشن کمیشن کا کہنا تھا کہ جو لوگ ویڈیو اسکینڈل میں ملوث ہیں ان سب کے نام بتائیں اور ناموں سمیت سارے ثبوت لے کر آئیں، ہم  ضرور ایکشن لیں گے۔

الیکشن کمیشن نے پی ٹی آئی کو نوٹیفکیشن روکنے کی درخواست میں ترمیم کرنے کی ہدایت کی ہے۔