وفاقی وزیر تعلیم شفقت محمود نے کہا ہے کہ ملک بھر میں تعلیمی ادارے  کھولنے کے حوالے سے اہم فیصلہ 24 مارچ کو کیا جائیگا۔

تفصیلات کے مطابق وفاقی وزیر تعلیم شفقت محمود نے لاہور چیمبر آف کامرس اینڈ انڈسٹری میں تاجروں سے خطاب کرتے ہوئے کہا ہے کہ تعلیمی ادارے بند کرنا مشکل فیصلہ تھا۔

وفاقی وزیر شفقت محمود نے کہا ہے کہ وزارت تعلیم کی خواہش ہےکہ تعلیمی ادارے کھلےرہیں تاہم 24 مارچ کو اجلاس میں حالات کو دیکھتے ہوئےفیصلہ کریں گے۔

شفقت محمود نے کہا ہے کہ تعلیمی اداروں میں تدریس اور آن لائن تعلیم میں بڑا فرق ہے اور آن لائن پڑھائی سے طالبعلم خوش نہیں ہیں۔

وفاقی وزیر نے کہا ہے کہ ملک بھر میں تعلیمی نظام بکھرا ہوا ہے، نجی اسکولوں میں انگریزی اور سرکاری اسکولوں میں اردو میں تعلیم دی جاتی ہے۔

انہوں نے کہا ہے کہ اب حکومت کی جانب سے یکساں نصاب تعلیم پورے ملک میں نافذ ہوگا کیونکہ نصاب میں ردوبدل کا دائرہ کار صوبوں کے دائرہ اختیار میں نہیں آتا ہے اسی لئے یکساں نصاب پر سندھ کے تحفظات دور کرنے کی کوشش کررہے ہیں۔

ان کا کہنا تھا کہ یکساں نصاب کا مقصد سب کو ایک پیج پر لانا ہے کیونکہ ہم نے اپنےاسکول کےنظام کو 3سے 4 سسٹم میں تقسیم کیا ہوا ہے۔

انہوں نے کہا ہے کہ ایلیٹ سکول، سرکاری اسکول، پرائیویٹ اسکول، مدارس ہر جگہ اپنا اپنا نصاب ہے اور اس مختلف نصاب نے عوام کو تقسیم کررکھا ہے۔