پاکستان مسلم لیگ ن کی نائب صدر مریم نواز کی جانب سے این اے249 کےعوام سے مفتاح اسماعیل کو ووٹ دینے کی اپیل کردی گئی ہے۔

تفصیلات کے مطابق اپنے ایک ویڈیو بیان میں پاکستان مسلم لیگ ن کی نائب صدر مریم نواز نے این اے 249 کےعوام سے مخاطب ہوتے ہوئے کہا ہے کہ کراچی کا دورہ کورونا وائرس کی وجہ سے ملتوی کیا ہے کیونکہ عوام کی زندگیوں کوخطرے میں نہیں ڈالنا چاہتی ہوں۔

مریم نواز نے کہا ہے کہ انتخابات کے حوالے سے عوام پر اعتماد ہے وہ درست فیصلہ کریں گے اس لئے عوام 29 اپریل کو کورونا ایس او پیز پرعمل کر کے پولنگ اسٹیشنز پہنچیں اور ووٹ دیں۔

مریم نواز کا کہنا تھا کہ ن لیگ نے ہی کراچی سمیت پورے پاکستان کو امن دیا تھا لیکن آج این اے 249 پانی کی عدم فراہمی سمیت مختلف مسائل سے بھرا ہوا ہے۔

انہوں نے کہا ہے کہ نالائق حکومت کی وجہ سے گرین لائن پایہ تکمیل کونہیں پہنچا جبکہ ن لیگ نے پورٹ قاسم میں انرجی پلانٹس ریکارڈ مدت میں لگائے تھے۔