وزیراعظم کے نمائندہ خصوصی مولانا طاہر اشرفی نے کہا ہے کہ مخیر حضرات مستحقین زکوٰۃ کو ویکسین خرید کر لگوا سکتے ہیں۔

تفصیلات کے مطابق گرینڈ جامع مسجد بحریہ ٹاؤن میں وزیراعظم کے نمائندہ خصوصی مولانا طاہر اشرفی نے جمعے کے  خطبے میں بتایا ہے کہ حکومت کی جانب سے نجی اسپتالوں کو بھی کورونا ویکسین لگانے کی اجازت دیدی گئی ہے۔

مولانا طاہر اشرفی نے کہا ہے کہ پاکستان میں مساجد اس وقت بھی کھلی رہیں جب بیت اللہ اور مسجد نبوی بند تھیں اور اب بھی کورونا کی لہر کے باوجود مساجد کھلی رہیں گی۔

ان کا کہنا تھا کہ کورونا ایس او پیز کے تحت مساجد کھولی جائیں گی جبکہ مساجد کمیٹیاں کورونا ایس او پیز پر عمل درآمد کروانے کی پابند ہونگی۔

انہوں نے مزید کہا ہے کہ کورونا کے باعث مختلف عرب ممالک میں مساجد بند کرنے کی خبریں پڑھ کر افسوس ہوتا ہے۔