پاک بحریہ کے جہاز پی این ایس عظمت نے ایران کا دورہ کیا ہے۔

پاک بحریہ کے ترجمان کے مطابق ایران کی بندرگاہ بندر عباس آمد پر ایرانی بحریہ کے افسران اور پاکستانی سفارتی حکام کی جانب سے جہاز کا استقبال کیا گیا۔

ترجمان نے بتایا ہے کہ پاک بحریہ کے مشن کمانڈر کی ایران کے سول و عسکری حکام سے اہم ملاقاتیں بھی ہوئی ہیں۔

ملاقاتوں کے دوران باہمی دلچسپی کے امور بشمول دوطرفہ بحری تعاون کے فروغ پر تبادلہ خیال کیا گیا ہے۔

ترجمان کے مطابق پاک بحریہ کے جہاز پی این ایس عظمت کی جانب سے ایرانی بحریہ کے جہازوں کے ہمراہ مشترکہ بحری مشق میں شرکت کی گئی ہے۔

ترجمان پاک بحریہ کا کہنا ہے کہ پاک بحریہ علاقائی میری ٹائم سیکیورٹی کو یقینی بنانے میں اپنا بھرپور کردار ادا کرتی رہے گی۔