وزیراعلیٰ سندھ سید مراد علی شاہ نے کہا ہے کہ کوئی شہری اپنی مرضی سے پرامن طریقے سے احتجاج کرنا چاہتا ہے تو اسے روکا نہیں جائیگا۔

تفصیلات کے مطابق وزیر اعلیٰ سندھ مراد علی شاہ نے میڈیا سے گفتگو کرتے ہوئے کہا ہے کہ سندھ حکومت مذہبی جماعتوں سے موجودہ حالات میں رابطے میں ہے۔

مراد علی شاہ کا کہنا تھا کہ وفاقی حکومت نے اس معاملے پر صوبوں کو اعتماد میں نہیں لیا، وفاقی حکومت تمام فیصلے صوبوں کو اعتماد میں لے کر کرتی تو بہتر ہوتا۔

انہوں نے کہا ہے کہ حکومت کی جانب سے وقتی فائدے کیلئے کسی کو بڑی تکلیف میں نہیں ڈالا جائے۔

اسکے علاوہ وزیراعلیٰ سندھ نے کہا ہے کہ کورونا کا پھیلاؤ روکنا بہت ضروری ہے گزشتہ روز بھی ڈیڑھ سو سے زائد اموات ہوئی ہیں۔

انہوں نے بتایا ہے کہ سندھ میں بھی کیسز بڑھ رہے ہیں اور اگر وفاق نے ایکشن نہ لیا توسندھ حکومت خود فیصلہ کرے گی۔