وزیراعظم کے معاون خصوصی برائے صحت ڈاکٹر فیصل سلطان نے کہا ہے کہ ملک میں ویکسی نیشن کا عمل شفاف طریقے سے جاری ہے، عوام این سی او سی کے فیصلوں پر اعتماد رکھیں۔

تفصیلات کے مطابق معاون خصوصی برائے صحت ڈاکٹرفیصل سلطان نے میڈیا بریفنگ کے دوران بتایا ہے کہ دنیا بھر میں ویکسین کی کمی ہے جبکہ پاکستان 3 کمپنیوں سے ویکسین خرید رہا ہے کیونکہ ویکسین کی ڈیمانڈ زیادہ اور سپلائی کم ہے۔

ڈاکٹر فیصل سلطان نے کہا ہے کہ وزیراعظم عمرا ن خان نے ایس او پیز پر عملدرآمد کیلئے پاک فوج کی مدد طلب کی ہے تاہم وباء بڑھتی رہی تو دیگر شہروں میں لاک ڈاؤن بھی لگایا جاسکتا ہے۔

انہوں نے بتایا کہ ملک بھرمیں ایک ہزار 200سےزائدویکسی نیشن سینٹرزقائم ہیں اور اب تک  20لاکھ سےزائدافرادکوکوروناویکسین لگ چکی ہے۔

ان کا کہنا تھا کہ ویکسی نیشن کاعمل شفاف طریقےسےجاری ہے اور اب 40 سال سےزائدعمروالوں کیلئے بھی ویکسی نیشن کی رجسٹریشن کھول دی گئی ہے۔

معاون خصوصی نے بتایا کہ این سی اوسی کی کمیٹی آکسیجن کی مانیٹرنگ کررہی ہے اور اضافی پلانٹ کےذریعے آکسیجن کیلئے کوششیں بھی کی جارہی ہیں۔

انہوں نے بتایا کہ پاکستان اسٹیل کےآکسیجن پلانٹ کا انجینئرز جائزہ لے رہے ہیں تاہم آکسیجن کو مختلف ممالک سے امپورٹ کرنے پر بھی غور کیا جارہا ہے۔

ڈاکٹر فیصل سلطان نے کہا ہے کہ پاکستان میں ہر روز ہیلتھ کیئر سسٹم کی صلاحیت کو بڑھایا جارہا ہے کیونکہ کورونا کی صورتحال سے شہر کے ہیلتھ سسٹم کا اندازہ لگایا جاتا ہے۔