وزیر اعظم کے معاون خصوصی برائے قومی صحت ڈاکٹر فیصل سلطان نے کہا ہے کہ حکومت کی جانب سے ماں بچے کی نگہداشت کیلئے جدید اسپتال ایک سال کے عرصے میں مکمل ہوجائے گا۔

تفصیلات کے مطابق ڈاکٹر فیصل سلطان نے راولپنڈی میں میڈیا سے گفتگو کرتے ہوئے بتایا ہے کہ حکومت ملک میں ماں اور بچے کے اسپتالوں میں بہترین طبی خدمات کی فراہمی کے لئے پرعزم ہے۔

انہوں نے مزید کہا کہ نوزائیدہ بچوں کی انتہائی نگہداشت اور جنرل سرجری کے علاوہ اس اسپتال میں پیڈیاٹرک سرجری بھی کروائی جائیں گی۔

 ڈاکٹر فیصل نے کہا کہ ماں اور بچوں کی اموات کی شرح کو کنٹرول کرنے کے لئے سہولیات کو مزید بہتر بنانے کے لئے اقدامات اٹھائے جارہے ہیں۔

انہوں نے کہا ہے کہ حکومت نے متعدد میگا پروجیکٹس شروع کر کے صحت کے شعبے پر خصوصی توجہ دی ہے جس کے تحت سرکاری اسپتالوں میں جدید ترین طبی سامان فراہم کیا جارہا ہے۔