وزیر خارجہ شاہ محمود قریشی نے کہا ہے کہ فلسطین اور کشمیر کے مسئلے میں گہری مماثلت ہے کیونکہ کشمیریوں کو بھی فلسطینیوں کی طرح کے مسائل کا سامنا ہے۔

تفصیلات کے مطابق وزیر خارجہ مخدوم شاہ محمود قریشی نے نیویارک میں پاکستان کے مستقبل مشن میں پاکستانی کمیونٹی کے اعزاز میں تقریب سے خطاب کیا ہے۔

وزیر خارجہ شاہ محمود قریشی نے کہا ہے کہ کشمیر پر ہمارا مؤقف واضح اور دو ٹوک ہے، اس حوالے سےکوئی باعزت طریقے سے بات کرنا چاہے تو کریں گے لیکن کوئی سودے بازی نہیں ہو گی۔

وزیر خارجہ نے کہا ہے کہ بیرون ملک مقیم پاکستانیوں کی فلاح و بہبود ہماری حکومت کی اولین ترجیحات میں شامل ہے، بیرون ملک مقیم پاکستانی کمیونٹی کا کردار قابلِ ستائش ہے۔

انہوں نے کہا ہے کہ حکومت پاکستان انتخابی اصلاحات کے ذریعے بیرون ملک مقیم پاکستانیوں کو پاکستان میں الیکشن میں حصہ لینے کا حق دینا چاہتی ہے، ان اصلاحات کا مقصد بیرون ملک مقیم پاکستانیوں کو مزید بااختیار بنانا ہے ۔

وزیرخارجہ نے بتایا ہے کہ وزیر اعظم عمران خان سیاحت کے حوالے سے نئی پالیسی بنا رہے ہیں جس سے سیاحت میں خاطر خواہ اضافہ ہو گا۔

ان کا مزید کہنا تھا کہ ہمیں دو طرفہ تعلقات کے فروغ کیلئے کلچرل ڈپلومیسی پر توجہ دینے کی ضرورت ہے۔