ترجمان دفتر خارجہ کی جانب سے تاجکستان کے صدر کے دورہ پاکستان کے حوالے سے بیان جاری کیا گیا ہے۔

جاری کردہ بیان میں ترجمان دفتر خارجہ کا کہنا ہے کہ تاجکستان کے صدر اپنے اعلیٰ سطح وفد کے ہمراہ کل دو روزہ دورے پر پاکستان پہنچیں گے۔

https://twitter.com/ForeignOfficePk/status/1399606767068274693

وزیر اعظم عمران خان کی دعوت پر تاجکستان کے صدر امام علی رحمان دو اور تین جون کو پاکستان کا دورہ کریں گے۔

دورے کے دوران وزیر اعظم عمران خان اور تاجکستان کے صدر وفود کی سطح پر بات چیت کریں گے اور متعدد معاہدوں پر دستخط کیے جائیں گے۔

دونوں فریقین کے درمیان تجارت، سرمایہ کاری، توانائی، دفاع، ثقافت، تعلیم اور علاقائی رابطوں میں باہمی تعاون کو بڑھانے پر تبادلہ خیال کیا جائیگا۔

تاجکستان کے صدر دورے کے دوران صدر مملکت ڈاکٹر عارف علوی سے بھی ملاقات کریں گے۔

ترجمان دفتر خارجہ کے مطابق پاکستان اور تاجکستان کے مشترکہ عقیدے ، مشترکہ تاریخ پر مشتمل قریبی برادرانہ تعلقات ہیں۔

ترجمان کا کہنا ہے کہ وسط ایشیا کے ساتھ قریبی تعلقات اور بہتر تعاون کے لے پاکستان کے وژن کے تناظر میں تاجکستان اہم ملک ہے۔