وزیر خارجہ  شاہ محمود قریشی نے کہا ہے کہ پاکستان میں سستی بجلی کے حصول کیلئے شمسی توانائی اور پن بجلی کے منصوبوں پر کام جاری ہے۔

تفصیلات کے مطابق چلڈرن اسپتال ملتان میں نئے سولر سسٹم کا سنگ بنیاد رکھنے کی تقریب سے خطاب کرتے ہوئے وزیر خارجہ شاہ محمود قریشی نے کہا ہے کہ سولر سسٹم پر منتقل ہونے سے اسپتال کو مفت بجلی  فراہم کی جائیگی۔

وزیر خارجہ نے کہا ہے کہ ہائیڈرل پراجیکٹ کی فنڈنگ مکمل ہوچکی ہے اور پاکستان بھر میں اگلے 10 سالوں کے دوران ہائیڈرل پراجیکٹ کے منصوبے مکمل ہوجائیں گے۔

وزیر خارجہ کا کہنا تھا کہ پاکستان کو مہنگی بجلی جیسے چیلنجز کا سامنا  ہے اور بجلی سستی کرنے کیلئے ہمارے پاس جادو کی چھڑی نہیں ہے لیکن سستی بجلی کیلئے پن بجلی اور شمسی توانائی کی طرف جارہے ہیں۔

انہوں نے کہا ہے کہ پن اورشمسی توانائی منصوبوں سے بجلی کی قیمتوں میں کمی ہوگی اور درست منصوبہ بندی سےعوام کے ٹیکس کا پیسہ بھی بچایا جاسکتا ہے۔