ایس ایس پی شکارپور اور ان کی پولیس ٹیم کے لیئے پچیس لاکھ روپے کے انعام کا اعلان ہوا ہے۔

تفصیلات کے مطابق آئی جی سندھ نے شکارپور کے کچے علاقے میں ڈاکوؤں سے ہونیوالے پولیس مقابلے میں عمدہ کارکردگی اور جرأت کا مظاہرہ کرنے پر ایس ایس پی شکار پور تنویر تنیو اور پولیس ٹیم کو شاباشی دیتے ہوئے پچیس لاکھ روپے نقد انعام دینے کا اعلان کیا ہے۔

آئی جی سندھ نے کہا کہ سندھ پولیس کو ایس ایس پی شکار پور تنویر تنیو پر فخر ہے اور ان جیسے افسر محمکہ پولیس کا قیمتی اثاثہ ہیں۔

ذرائع کا کہنا تھا کہ ہلاک ہونے والے ڈکیت علاقے میں خوف کی علامت سمجھے جاتے تھے اور دونوں ڈاکو قتل، اقدام قتل، ڈکیتی، اغواء برائے تاوان، پولیس سے مزاحمت اور دوسرے سنگین جرائم میں مجموعی طور پر 48 مقدمات میں مطلوب تھے۔

ذرائع کا یہ بھی کہنا تھا کہ ڈھائی ماہ قبل 23 مئی 2021 کو اسی گینگ نے پولیس کے دو جوانوں سمیت ایک شہری کو شہید کیا تھا اور اگست 2019 میں ڈی ایس پی راؤ شفیع اللہ بھی انہی ڈاکوؤں کی وجہ سے شہید ہوئے تھے۔

یاد رہے کہ یہ ڈاکو تھانہ ناپر کوٹ ضلع شکارپور کے حدود میں وارداتیں کرتے تھے اور ان کے اوپر زندہ یا مردہ گرفتاری پر ایک کروڑ روپے انعام کی سفارش تھی۔