ترجمان دفتر خارجہ زاہد حفیظ چوہدری نے کہا ہے کہ امید ہے کہ افغانستان کی حکومت جلد ازجلد مطلوبہ معلومات اور رسائی فراہم کرے گی۔
تفصیلات کے مطابق ترجمان دفتر خا رجہ نے اپنے ایک بیان میں کہا کہ میں نےافغانستان کی وزارت خارجہ کا بیان اورافغانستان کے سفیر کی صاحبزادی کی وڈیو دیکھی ہے۔
ان کا کہنا تھا کہ افغانستان کے وفد کو بتایا گیا تھا کہ تحقیقاتی حقائق افغان سفیر کی صاحبزادی کے بیان کی تصدیق نہیں کرتے،سامنے آنے والے حقائق افغان سفیر کی صاحبزادی کے بیان کے مطابق نہیں ہیں۔
زاہد حفیظ کا کہنا تھا کہ وفد سے افغانستان کے سفیر کی صاحبزادی تک رسائی کی درخواست کی گئی جبکہ وفد سے سفارت خانے اور فون ڈیٹا تک رسائی کی درخواست بھی کی گئی ہے۔
ان کا کہناتھا کہ افغانستان کے وفد کو افغان سفیر کی صاحبزادی سے متعلق تمام حقائق سے آگاہ کیاگیا،افغان وفد کو ان تمام مقامات کا دورہ کرایا گیا جہاں افغان سفیر کی صاحبزادی16 جولائی کو گئی تھیں۔افغان وفد کو ایف7، جی 7، راولپنڈی، دامن کوہ، ایف6 اور ایف 9 پارک کا دورہ بھی کرایاگیا تھا۔