یوٹیلیٹی اسٹور کی سرکاری چینی بلیک میں فروخت کرنے والے گروہ کو پولیس نے گرفتار کر لیا ہے۔

تفصیلات کے مطابق ایڈیشنل اسسٹنٹ کمشنر عادل وسیم اور ایس ایچ او شرقی عبداللہ جلال کی مشترکہ کارروائیوں کی وجہ سے پشاور میں یوٹیلیٹی اسٹور کی سرکاری چینی بلیک میں فروخت کرنے والا گروہ لیڈر سمیت گرفتار ہو گیا ہے۔

ڈپٹی کمشنر پشاور خالد محمود نے کہا کہ گروہ کے ارکان یوٹیلیٹی سٹورز انتظامیہ کی ملی بھگت سے چینی بلیک میں فروخت کر رہے تھے۔ ہم نے یوٹیلیٹی اسٹور کا مینیجر بھی گرفتار کر لیا ہے۔

ڈپٹی کمشنر پشاور نے کہا کہ ہم نے چارسدہ روڈ اور انڈسٹریل اسٹیٹ میں گوداموں پر چھاپہ مارا تھا اور چھاپے کے دوران یوٹیلیٹی اسٹور سے 52 چینی سے بھری بوریاں برآمد ہوئی ہیں۔ اس کے ساتھ ہزاروں کی تعداد میں خالی شدہ پلاسٹک بیگ بھی یوٹیلیٹی اسٹور سے برآمد ہوئے ہیں۔

ڈپٹی کمشنر پشاور کا کہنا تھا کہ گروہ کے ارکان یوٹیلیٹی اسٹور کی پیکنگ سے چینی نکال کر پرائیویٹ پیکنگ میں پیک کر کے بیچتے تھے۔

ڈپٹی کمشنر پشاور خالد محمود کا مزید کہنا تھا کہ گرفتار افراد کے خلاف قانونی کارروائی عمل میں لائی جائے گی۔