ملتان میں ڈی ایس پی کو رشوت دینا ایس ایچ او کو بہت مہنگا پڑ گیا ہے۔

تفصیلات کے مطابق ملتان میں ڈی ایس پی نے اپنے سرکل کے ایس ایچ او کے خلاف رشوت دینے کا مقدمہ درج کروا دیا ہے۔

ذرائع کا کہنا ہے کہ ایس ایچ او دہلی گیٹ کو گرفتار کر کے حوالات منتقل کر دیا گیا ہے۔

ذرائع نے کہا کہ دہلی گیٹ پولیس نے غیر قانونی سم بیجنے والے گروہ کو گرفتار کیا تھا، ملزمان عمران اور شہباز سے ایس ایچ او نے ڈھائی لاکھ روپے رشوت وصول کی۔ ایس ایچ او نے رشوت لے کر شہباز کو چھوڑ دیا جبکہ عمران سے برآمد سموں کی تعداد بھی کم کر دیں۔

ذرائع کے مطابق ایس ایچ او دہلی گیٹ وسیم اکرم نے ڈھائی لاکھ روپے رشوت وصول کر کے ڈی ایس پی کو 70 ہزار دینے کی پیشکش کی۔

ذرائع کا کہنا ہے کہ ڈی ایس پی دہلی گیٹ نے معاملے کے بارے میں سی پی او ملتان منیر مسعود مارتھ کو آگاہ کیا۔

ذرائع کا کہنا ہے کہ سی پی او کے حکم پر ڈی ایس پی نے ایس ایچ او دہلی گیٹ کے خلاف مقدمہ درج کر لیا تھا اور اب ایس ایچ او دہلی گیٹ کو گرفتار کر لیا ہے۔