کراچی میں کیبل نیٹ کے دفتر پر مسلح ملزمان نے ڈکیتی کی ہے۔

تفصیلات کے مطابق یہ واردات کراچی کے علاقے کورنگی مہران ٹاون میں پیش آئی جہاں کچھ مسلح ملزمان نے کیبل نیٹ کے دفتر میں ڈکیتی کی اور ساتھ شہری پر تشدد بھی کیا جس کی سی سی ٹی وی ویڈیو بول نیوز نے حاصل کر لی۔

سی سی ٹی وی میں دیکھا گیا کہ چار ملزمان دفتر میں گھسے اور لوٹ مار کرنے لگے۔

سی سی ٹی وی فوٹیج کے مطابق چاروں ملزمان قمیض شلوار میں ملبوس تھے اور فیس ماسک پہنا ہوا تھا۔

فوٹیج میں ملزمان کو ایک شہری پر تشدد کرتے ہوئے بھی دیکھا گیا ہے۔

ذرائع کا کہنا ہے کہ ملزمان 17 ہزار کے قریب رقم اور 4 موبائل فونز چھین کر فرار ہو گئے۔

ذرائع کا کہنا ہے کہ اس واردات میں کل 6 افراد شامل تھے اور لوٹ مار کرنے والے ملزمان کے دو ساتھی باہر کھڑے ہوئے تھے۔

ذرائع کے مطابق ملزمان نے فرار ہوتے ہوئے بھی ایک راہگیر کو لوٹ مار کا نشانہ بنایا۔

پولیس کا کہنا ہے کہ واقعہ گذشتہ رات ساڑھے 11 بجے مہران ٹاون میں پیش آیا ہے۔

پولیس کا مزید کہنا تھا کہ اس واقعے کا مقدمہ درج ہو چکا ہے اور اس واردات کی تحقیقات جاری ہیں۔