وفاقی وزیر نیشنل فوڈ اینڈ سیکیورٹی فخر امام نے کہا ہے کہ پاکستان کی زراعت میں بہتری آ رہی ہے۔
فخر امام نے ملتان میں بیان دیتے ہوئے کہا کہ پاکستان کی زراعت میں بہتری آ رہی ہے، پچھلے سال کی نسبت اس سال ہمارے ہدف سے زیادہ پیداوار ہوئی ہے۔ اگر موسم نے ساتھ دیا تو ہم اپنا ٹارگٹ پورا کر لیں گے۔
فخر امام کا کہنا تھا کہ موسم اچھا رہنے سے کپاس کی فصل پر اچھے اثرات مرتب ہوئے ہیں۔ 60 فیصد ہماری امپورٹ کپاس پر ہے جس کی اس دفعہ اچھی پیداوار ہوئی ہے۔
وفاقی وزیر نیشنل فوڈ اینڈ سیکیورٹی کا کہنا تھا کہ اگلے ہفتے تک گندم کی نئی قیمت کا تعین کیا جائے گا، 225 روپے گنے کی سرکاری قیمت مقرر کی گئی ہے اور کھاد کی قیمتیں بڑھی ہیں کیونکہ 70 فیصد ہم باہر سے کھاد منگواتے ہیں۔
فخر امام نے کہا کہ چھوٹے کاشتکاروں کے لیے سبسڈی دی جا رہی ہے، کسان کارڈ کے ذریعے کسانوں کو سبسڈی سے فائدہ ہو گا۔