بارکھان میں میزل روبیلا کیمپین شروع ہونے کے انتظامات مکمل ہو گئے ہیں۔
تفصیلات کے مطابق بارکھان میں میزل روبیلا کیمپین 15 نومبر سے شروع ہو گی جس کے انتظامات مکمل ہو گئے ہیں۔
ذرائع کا کہنا ہے کہ بارکھان میں یونیسیف اور ڈبلیو ایچ او کے تعاون سے دو روزہ ٹریننگ کا انعقاد کیا گیا جس میں ڈی ایچ او ڈاکٹر عبدالحمید لہڑی، ڈپٹی ڈی ایچ او ڈاکٹر ماجد آمین کھیتران، ایم ایس ڈاکٹر مسعود کھیتران، ڈی ایس وی عبدالواحد، ڈبلیو ایچ او کے نمائندے ڈاکٹر مجیب بگٹی، پی پی ایچ آئی سے رفیق بزدار، ڈسٹرکٹ فوکل پرسن حنیف کھیتران، ایم اینڈ ای محمد ایوب، ایاز خان اور قدیرآغا علاوہ یوسی ایم او، علماء کرام اور صحافی برادری شریک تھے۔
ذرائع نے کہا کہ دو روزہ ٹریننگ سیشن میں ٹرینرز حنیف کھیتران، یونس کھیتران، رفیق بزدار، ڈاکٹر مجیب بگٹی و دیگر نے ٹریننگ کے اغراض و مقاصد اور شرکاء کو میزل روبیلا کے ویکسی نیشن کے بارے میں معلومات فراہم کی۔
ذرائع کے مطابق سیشن کے بعد میڈیا سے گفتگو میں ڈی ایچ او ڈاکٹر عبدالحمید لہڑی نے کہا کہ میزل روبیلا کیمپین کی کامیابی میں باشعور افراد اپنا کردار ادا کریں، کمیونٹی لیول پر اس مہم کی افادیت اور بچوں کو ویکسی نیشن کے بعد بیماریوں کے حملوں سے بچانے کے فوائد بتائیں جائیں اور گھر گھر اس کیمپین سے متعلق عوام میں شعور بیدار کیا جائے تاکہ مہم کے دوران والدین اور شہری بچوں کو آسانی سے ویکسین کرالیں۔