عثمان بزدار نے کہا ہے کہ کاشتکاروں کو پیداوار میں اضافے کیلئے مزید سہولتیں فراہم کریں گے۔

وزیراعلیٰ پنجاب سردار عثمان بزدار سے کسان اتحاد کے سربراہ خالد کھوکھر کی قیادت میں وفد کی ملاقات ہوئی جس میں کاشتکاروں کی فلاح و بہبود اور ان کے مسائل کے حل کیلئے اقدامات پر بات چیت کی گئی۔

اس موقع پر عثمان بزدار نے کہا کہ پنجاب میں کرشنگ سیزن کا آغاز ہو چکا ہے ، پنجاب میں گنے کی کم از کم قیمت 225 روپے من مقرر کی ہے ۔

 وزیراعلیٰ پنجاب کا کہنا تھا کہ ملوں کو گنے کے کاشتکاروں کو پکی رسیدیں دینے کا پابند کیا گیا ہے، گنے کے کاشتکاروں کو ان کی محنت کا پورا معاوضہ دلایا جائے گا-

عثمان بزدار  کا یہ بھی کہنا تھا کہ رحیم یار خان، بہاولنگر اور دیگر علاقوں میں پانی چوری کے خلاف بلا امتیاز کارروائی ہو گی ، پنجاب حکومت رواں برس ڈی اے پی پر 11 ارب روپے کی سبسڈی دے رہی ہے۔

وزیراعلیٰ پنجاب  نے کہا کہ کاشتکارو ں کے لئے کھاد کی بروقت فراہمی یقینی بنائیں گے ، مظفر گڑھ میں فش فارمنگ کے لئے رقبے کے استعمال کے حوالے سے پالیسی وضع کر کے کابینہ میں پیش کی جائے گی اور اس ضمن میں کاشتکاروں کے تحفظات کا ازالہ کریں گے۔

عثمان بزدار   کا کہنا تھا کہ اللہ تعالیٰ کے فضل و کرم اور کسان کی محنت سے فصلوں کی پیداوار میں بے پناہ اضافہ ہوا ہے۔ حکومت کے کسان دوست اقدامات سے کاشتکار کو اس کی محنت کا معاوضہ ملا ہے۔

وزیراعلیٰ پنجاب   سردارعثمان بزدار نے کاشتکاروں کے مسائل کے حل کے لئے جلد حتمی سفارشات تیار کرنے کی ہدایت کرتے ہوئے  مزید کہا کہ کاشتکاروں کو پیداوار میں اضافے کیلئے مزید سہولتیں فراہم کریں گے۔

ملاقات میں  خالد کھوکھر نے کہا کہ تحریک انصاف کی حکومت کے دور میں کاشتکار کو اس کی محنت کا پورا معاوضہ ملا ہے۔

کسان اتحادکے سربراہ خالد کھوکھر کا مزید کہنا تھا کہ زرعی پیداوار میں اضافے کے لئے آپ کی پالیسیاں قابل تعریف ہیں، زرعی شعبے پر زیادہ سے زیادہ سرمایہ کاری سے سبز انقلاب آئے گا۔

مشیر حنیف پتافی، سیکرٹریز زراعت، خوراک، صنعت، آبپاشی، ممبر بورڈ آف ریونیو کالونیز، کین کمشنر اور متعلقہ حکام بھی اس موقع پر موجود تھے۔