اسلام آباد ہائی کورٹ نے اصول طے کر دیا ہے کہ نیب کب کسی کی جائیداد ضبط کر سکتا ہے؟

بول نیوز کے مطابق اسلام آباد ہائی کورٹ نے سابق ڈی جی پارکس کراچی لیاقت قائم خانی کے گھر چھاپے میں بھائیوں اور رشتے داروں کی گاڑیوں کی ضبطگی غیر قانونی قرار دینے سے متعلق تحریری فیصلہ جاری کردیا ہے۔

چیف جسٹس اسلام آباد ہائی کورٹ جستس اطہر من اللہ اور جسٹس عامر فاروق پر مشتمل بنچ نے 18 صفحات پر مشتمل تحریری فیصلے میں کہا ہے کہ نیب صرف وہی جائیداد ضبط کر سکتا ہے جس کا زیر تفتیش کیس سے تعلق ہو۔

عدالت نے فیصلے میں ضبط کی گئیں گاڑیاں واپس نہ کرنے سے متعلق احتساب عدالت کا فیصلہ کالعدم قراردیتے ہوئے کہا کہ نیب شاہ رخ جمال اور دیگر کی گاڑیوں کی ضبطگی کا کیس سے تعلق نہیں دکھا سکا۔ تینوں افراد کے اپنے کاروبار ہیں۔ لیاقت قائمخانی کے گھر سے برآمد 8 میں سے پانچ گاڑیوں کی ضبطگی غیر قانونی تھی ۔ احتساب عدالت پانچوں گاڑیاں جلد اپنے اصل مالکان کے حوالے کرائے۔ نیب صرف وہی جائیداد ضبط کر سکتا ہے جس کا زیر تفتیش کیس سے تعلق ہو، ضبط کی گئی جائیداد کا ملزم اور جرم سے تعلق ہونا ضروری ہے۔

واضح رہے کہ تفتیش کے دوران لیاقت قائم خانی کے گھر اور دیگر جگہوں سے کروروں روپے کے طلائی زیورات اور نوادرات برآمد ہوئے تھے۔