چئیر مین پاک سر زمین پارٹی سید مصطفیٰ کمال نے کہا ہے کہ تباہی آ نہیں رہی تباہی آ گئی ہے ۔

مصطفیٰ کمال نے بھٹہ ویلج کیماڑی میں احتجاجی جلسے سے خطاب کرتے ہوئے کہا کہ عوام کے پاس دال خریدنے تک کے اب پیسے نہیں رہے۔

ان کا کہنا تھا کہ دن میں گیس نہیں رات میں بجلی نہیں، تباہی پوری طاقت سے آ گئی ہے۔ تباہی آ نہیں رہی تباہی آ گئی ہے۔

انہوں نے کہا کہ آج پورے ملک میں عمران خان کی حکومت کے خلاف مظاہرے ہو رہے ہیں، غضب خدا کا کہ بلاول بھٹو عمران خان کے خلاف مظاہرے کر رہے ہیں۔

مصطفیٰ کمال نے کہا کہ پیپلز پارٹی کو 10242 ارب وفاق سے ملے لیکن آج ایک قطرہ پانی نہیں ملتا، 13 سال میں ایک بس نہیں آئی، لاڑکانہ میں بچوں کو کتے کاٹتے ہیں وہاں ویکسین نہیں آئی، تھر میں مائیں وہاں سے پانی لاتی ہیں جہاں جانور پانی پیتے ہیں۔

ان کا مزید کہنا تھا کہ صرف گو نیازی گو نہیں بلکہ گو زرداری گو کے بغیر سندھ میں کوئی تبدیلی نہیں آئے گی، کراچی سے کشمیر تک 90 فیصد پاکستان کے مسائل ان دو ترامیم سے حل ہو جائیں گے۔