ضلعی انتظامیہ لاہور نے شہر میں ریڑھی بازوں کے لیے بڑا اقدام کرنے کا فیصلہ کر لیا ہے۔

اب آسان روزگار کے لیے ریڑھی بانوں سے رجسٹریشن فارم فل کروا کر ریڑھی نمبر دیا جائے گا۔

ضلعی انتظامیہ لاہور ابتدائی طور پر 13 ماڈل ریڑھی بازار فعال کرے گی اور ابتدائی طور پر فی بازار میں 20 ریڑھیوں کی رجسٹریشن کی جائے گی۔

پہلے مرحلہ میں  ترکی کی طرز پر ماڈل ریڑھی بازار لال پل اور میاں پلازہ کے مقام پر بازار سجایا جائے گا۔

دوسرے مرحلے میں شاہدرہ موڑ اور دہلی گیٹ سجائے جائیں گے۔

تیسرے مرحلے میں ماڈل ریڑھی بازار گرین ٹاون مارکیٹ ڈی ٹو، نشتر کالونی اور کنال روڈ لال پل پر لگائے جائیں گے۔

چوتھے مرحلے میں ماڈل ریڑھی بازار شادمان، بابا گراونڈاور شادباغ گول باغ لگائے جائیں گے۔

پانچویں مرحلے میں ماڈل ریڑھی بازار میاں پلازہ، سبزار زار گراونڈ، مہران بلاک اقبال ٹاؤن اور بی ار بی نہر پر لگائے جائیں گے۔

ضلعی انتظامیہ لاہور اخوت فاؤنڈیشن کے ساتھ مل کر مائیکرو فنانس فراہم کرے گی۔

ڈپٹی کمشنر لاہور عمر شیر چٹھہ نے اس بارے میں ہنگامی اجلاس طلب کر لیا اور ایڈیشنل ڈپٹی کمشنر جنرل شاہد عباس کاٹھیا کو تین دن کے اندر کام کو مکمل کرنے کی ہدایت بھی کر دی۔

عمر شیر کا یہ بھی کہنا ہے کہ ماڈل ریڑھی بازاروں میں سینیٹیشن، پیور ورک، ٹف ٹائلز، لائیٹس اور شکایت سیل فعال کیے جائیں اور بازاروں کو مکمل فعال کرنے کے بارے میں افسران جلد رپورٹ جمع کروائیں۔