پاکستان کیمیائی ہتھیاروں پر پابندی کی تنظیم کی ایگزیکٹو کونسل کے لیے دوبارہ منتخب ہوگیا ہے۔

دفتر خارجہ کے ترجمان عاصم افتخار کی جانب سے جاری بیان میں کہا گیا ہے کہ پاکستان کو 2022-2024 کے لیے کیمیائی ہتھیاروں پر پابندی کی تنظیم کی ایگزیکٹو کونسل کے لیے دوبارہ منتخب کر لیا گیا ہے۔ تنظیم کی ایگزیکٹو کونسل کے رکن کے لیے انتخابات 29 نومبر سے 2 دسمبر تک دی ہیگ میں منعقدہ ریاستی جماعتوں کی کانفرنس کے 26 ویں اجلاس کے دوران ہوئے۔

عاصم افخار نے کہا کہ ایگزیکٹو کونسل کیمیائی ہتھیاروں پر پابندی کی تنظیم کا بنیادی پالیسی ساز ادارہ ہے، ایگزیکٹو کونسل کنونشن کے مؤثر نفاذ اور اس کی تعمیل کی نگرانی کا ذمہ دار ہے۔

ترجمان دفتر خارجہ کا مزید کہنا تھا کہ پاکستان کیمیائی ہتھیاروں پر پابندی کی تنظیم کا ایک فعال رکن ہے اور تنظیم کے مقاصد کی تکمیل کے لیے تعمیری کردار ادا کر رہا ہے، کیمیائی ہتھیاروں پر پابندی کی تنظیم کی41 رکنی ایگزیکٹو کونسل کے لیے دوبارہ انتخاب پاکستان کے مثبت کردار کا منہ بولتا ثبوت ہے۔