ڈی جی سی اے اے خاقان مرتضیٰ نے کہا ہے کہ انٹرنیشنل سول ایوی ایشن کی طرف سے پاکستان سی اے اے کا آڈٹ بہت شاندار رہا ہے۔

خاقان مرتضی نے کراچی میں پریس کانفرنس کرتے ہوئے کہا کہ انٹرنیشنل سول ایوی ایشن آرگنائزیشن نے 11 سال بعد پاکستان سی اے اے کا آڈٹ کیا جس کے بعد آرگنائزیشن نے آڈٹ میں پاکستان سی اے اے کو کلیئر کر دیا ہے۔

ڈی جی سی اے اے نے کہا کہ اس بارے میں باقائدہ رپورٹ جنوری کے وسط میں جاری ہو گی۔

خاقان مرتضی کا کہنا تھا کہ آڈٹ رپورٹ کے بعد پی آئی اے اور دیگر پاکستانی ایئرلائنز پر یورپی ملکوں میں عائد پابندیاں ختم ہو جائیں گی اور اسکائی ونگز ایوی ایشن کے لائسنس تجدید کا معاملہ بھی کل وفاقی کابینہ اجلاس میں حل ہو جائے گا۔

ان کا کہنا تھا کہ پائلٹس لائسنس معاملے پر عائد پابندی ہٹنے کے بعد برطانیہ کی سی اے اے سے پائلٹس لائسنس امتحانات شروع کریں گے جس پر سی اے اے سبسڈی دے گی۔