اسپیکر پنجاب اسمبلی چودھری پرویزالٰہی نے کہا ہے کہ سعودی عرب نے ہمیشہ مشکل وقت میں پاکستان کا ساتھ دیا ہے۔

شاہی مہمان نواز شیخ عبداللہ محمد السمان نے روضہ رسولﷺ میں سابق وزیراعظم چودھری شجاعت حسین اور اسپیکر پنجاب اسمبلی چودھری پرویزالٰہی سے آج ملاقات کی جس پر چودھری شجاعت حسین کا کہنا تھا کہ پاکستان اور سعودی عرب کے درمیان دوستی کے تعلقات کسی مصلحت کا شکار نہیں ہیں۔

چودھری شجاعت حسین کا کہنا تھا کہ ہمارے دل مکہ اور مدینہ میں دھڑکتے ہیں جس پر پرویزالٰہی کا کہنا تھا کہ شجاعت صاحب کو خانہ کعبہ اور روضہ رسولﷺ کے اندر حاضری کا شرف بھی حاصل ہے۔

شیخ عبداللہ محمد السمان کا اس موقعے پر کہنا تھا کہ مجھے پتہ چلا ہے کہ پنجاب اسمبلی میں آپ قانون سازی کر کے ختم نبوتﷺ کے حوالے سے دین کی خدمت کر رہے ہیں، قرآن پاک کا ترجمہ بھی تعلیمی نصاب میں شامل کروایا ہے، پاکستان کی تاریخ میں پہلی بار دین کی خدمت اس طرح کی گئی ہے جس پر آپ مبارکباد کے مستحق ہیں۔

ان کا کہنا تھا کہ چودھری پرویزالٰہی کی دین کی خدمات کے صلہ میں اللہ تعالیٰ ضرور اس کا اجر عطا فرمائے گا۔

شیخ عبداللہ محمد السمان نے چودھری شجاعت حسین کی صحت یابی و درازی عمر اور پاکستان کی سلامتی کے لیے خصوصی دعا بھی کروائی اور چودھری شجاعت حسین نے بھی ملاقات میں اپنی کتاب معزز مہمانوں کو پیش کی۔

اس موقع پر محمد رضی الشریف، عبدالقدیر، راسخ الٰہی، شافع حسین، میاں فاروق، چودھری تنویر اور سیکرٹری پنجاب اسمبلی محمد خان بھٹی نے بھی شرکت کی۔