وزیر اعلیٰ خیبرپختونخوا کے معاون خصوصی اطلاعات بیرسٹر محمد علی سیف نے بلدیاتی الیکشن سے متعلق قائم ایمرجنسی کنٹرول روم کا آج دورہ کیا۔

بیرسٹر سیف نے وزیراعلیٰ سیکریٹریٹ میں پرامن انتخابات کے انعقاد کے لیے قائم ایمرجنسی کنٹرول روم کا دورہ کیا اور ایمرجنسی کنٹرول روم میں انتظامات کا جائزہ لیا۔

بیرسٹر سیف کا کہنا تھا کہ ایمرجنسی کنٹرول روم صوبے میں پرامن اور سازگار ماحول میں انتخابات کے انعقاد کے لیے وزیراعلیٰ محمود خان کی ہدایت پر قائم کیا گیا ہے، کنٹرول روم آج سے فعال ہے اور انتخابات کے ایک دن بعد 20 دسمبر تک سرگرمیاں انجام دے گا جس میں عملہ چوبیس گھنٹے ایمرجنسی کنٹرول روم میں موجود رہے گا۔

ان کا کہنا تھا کہ ایمرجنسی کنٹرول روم بلدیاتی انتخابات کے دوران معلومات اور ہنگامی صورتحال کے بارے میں متعلقہ اسٹیک ہولڈرز کے ساتھ قریبی رابطے میں ہو گا۔

معاون خصوصی برائے اطلاعات نے کہا کہ کنٹرول روم کسی بھی ناخوشگوار واقعے یا ہنگامی صورتحال میں انتظامیہ، پولیس و قانون نافذ کرنے والے اداروں کو مطلع کرے گا اور انتخابات کے دوران کسی ناخوشگوار واقعے یا امن و امان کی صورتحال سے متعلق معلومات براہ راست وزیراعلیٰ کو فراہم کی جائیں گی۔