الیکشن کمشنر پنجاب غلام اسرار خان نے کہا ہے کہ انتخابی فہرستوں کی نظر ثانی کے حوالہ سے ووٹرز کی جانچ کا 80 فیصد کام مکمل ہو چکا ہے۔

غلام اسرار خان نے سرگودھا میں میڈیا سے گفتگو کرتے ہوئے کہا کہ انتخابی فہرستوں کی نظر ثانی کے حوالے سے ووٹرز کی جانچ پڑتال کی مہم 6 دسمبر 2021 تک جاری رہے گی تاکہ انتخابی فہرستوں میں شامل نہ ہونے والے ووٹرز کے اندراج کو یقینی بنایا جا سکے۔

ان کا کہنا تھا کہ اس مہم میں شناختی کارڈ پر درج پتہ مد نظر رکھا جائے گا تاکہ آئندہ انتخابات کے لیے غلطیوں سے پاک انتخابی فہرستیں مرتب کی جاسکیں۔

صوبائی الیکشن کمشنر نے کہا کہ ووٹوں کی درستی و اندراج کو یقینی بنانے کے امور کی کڑی مانیٹرنگ کی جا رہی ہے۔

انہوں نے کہا کہ ایسے افراد جو ترک سکونت کر گئے ہیں یا وفات پا گئے ہیں ان سے متعلق معلومات حاصل کی جا رہی ہیں۔

اسرار خان نے کہا کہ عوام میں آگاہی کے سلسلے میں معززین علاقہ اور آئمہ مساجد کے ذریعہ اعلانات کروائے جا رہے ہیں اور ہماری میڈیا سے اپیل ہے کہ گھر گھر ووٹرز کی جانچ پڑتال کے حوالے سے عوام کو آگاہی فراہم کرے۔

انہوں نے مزید کہا کہ مہم کے دوران تصدیق کنندہ گھر گھر جا کر انتخابی فہرستوں کی جانچ پڑتال کر رہے ہیں، عوام سے اپیل ہے کہ انتخابی فہرستوں کی جانچ پڑتال مہم کے سلسلے میں ٹیموں کے ساتھ بھرپور تعاون کریں۔